Hann var handtekinn fljótlega eftir að hann hengdi borðana upp og ekki er vitað hver örlög hans urðu en ganga má út frá að hann hafi hlotið þunga refsingu.
Mótmæli eru mjög sjaldgæf í Kína og þeim sem dirfast að gagnrýna kerfið og stjórn kommúnistaflokksins er yfirleitt varpað í fangelsi í langan tíma.
En nú hafa óánægðir borgarar fundið aðferð til að deila óánægju sinni með kerfið með hver öðrum. Þetta á sér stað á almenningssalernum en þau eru meðal þeirra sárafáu staða í kínverskum stórborgum þar sem ekki er allt fullt af eftirlitsmyndavélum.
Hinn óháði miðill China Digital Times segir að hér sé nánast um klósettbyltingu að ræða. Byltingu þar sem gagnrýnisraddir heyrast í formi texta, sem eru skrifaðir á veggi og dyr á almenningssalernum um allt land.
China Digital Times hefur birt sumt af því sem hefur verið skrifað á samfélagsmiðlum en þeir textar fá yfirleitt ekki að standa lengi þar sem ströng ritskoðun er við lýði.
En það sem er skrifað á veggi og dyr á salernum fær að standa lengur.
Margt af því sem hefur verið skrifað að undanförnu virðist eiga rætur að rekja til „borðamannsins“ sem var nefndur hér í inngangi greinarinnar.
China Digital Times segir að „klósettbyltingin“ sé að margra mati „hin nýja klósettbylting“ og er þar vísað til klósettbyltingar Xi Jinping sem hann hleypti af stokkunum 2015. Markmið hennar var að bæta aðstöðuna á klósettum úti á landi og á ferðamannastöðum.
En hugsanlega verður þessi klósettbylting kveðin í kútinn fljótlega því margir eru sannfærðir um að yfirvöld muni fljótlega krefjast þess að fólk láti skanna andlit sitt við innganginn á almenningssalernum. Það er nú þegar gert á almenningssalernum við Hof himnanna í Peking. Yfirvöld segja það gert til að koma í veg fyrir þjófnað á salernispappír og til að tryggja að fólk hegði sér almennilega. Gegn því að láta skanna andlitið við innganginn fær fólk 60 cm af salernispappír en á móti vita yfirvöld nákvæmlega hverjir nota klósettin.
