Donald Trump er sannfærður um að Bandaríkin muni á endanum ná „frábærum samningum“ við Íran til að binda endi á stríðið sem nú hefur staðið yfir frá 28. febrúar. Þetta segir forsetinn í samtali við CNBC.

„Ég held þeir hafi ekki um annað að velja,“ sagði Trump sem trúir því að friðarviðræðurnar sem nú eru að hefjast muni bera góðan árangur. „Við erum búin að tortíma sjóhernum þeirra, við höfum tortímt flughernum og við höfum tortímt leiðtogum þeirra.“

Trump segir að það hafi flækt stöðuna að vissu leyti að Bandaríkin hafi ráðið leiðtoga Írans af dögum, en þeir leiðtogar sem tóku við séu mun skynsamari en forverar þeirra.

„Þetta eru stjórnarskipti, sama hvað þú vilt kalla það, sem er ekki eitthvað sem ég sagðist ætla að gera, en ég hef gert það með óbeinum hætti.“

Trump segist þó aðspurður ekki vera tilbúinn til að framlengja vopnahlé þó að friðarviðræður dragist á langinn. „Það vil ég ekki gera. Við höfum ekki það mikinn tíma.“

Forsetinn telur Bandaríkin vera í sterkri stöðu í viðræðunum og muni því enda með frábæran friðarsamning. Friðarviðræðurnar fara fram í Pakistan og mun varaforseti Bandaríkjanna, JD Vance, koma þar fram sem fulltrúi þjóðar sinnar ásamt tveimur öðrum embættismönnum. Ekki er víst hvort að Íran muni mæta til viðræðnanna en Trump hefur tekið fram að ef ekki tekst að ná samningum áður en vopnahlé rennur út þá muni Bandaríkin hefja loftárásir á ný. Tíminn er naumur því vopnahléinu lýkur á morgun.