Starfsmenn í ríkisreknu útgerðinni Fishcor í Namibíu fengu ekki útborgað fyrir janúar mánuð í gær en hluti af launum þeirra fyrir desember er enn ógreiddur líka. Venjulega er borgað þann 25. í hverjum mánuði en það gekk ekki í þetta skiptið.
Stjórnarformaður Fishcor, Mihe Gaomab II, segir að félagið sé að vinna hart að því að starfsmenn fái borguð öll sín laun fyrir þessa tvo mánuði. „Vonandi verður öllum borgað fyrir desember og janúar. Við miðum við að borga þetta í þessum mánuði,“ sagði Gaomab í samtali við Namibian Sun um málið.
Þá sagði Gaomab að fyrirtækið sé í vandræðum vegna ástands efnahagsins. „Efnahagslegu skylirðin í dag gera bæði einkareknum og ríkisreknum fyrirtækjum erfitt fyrir. Við sem stjórn verðum áfram staðráðin í því að sjá til þess að öllum verði borgað fyrir sína vinnu.“
Heimildarmaður Namibian Sun furðar sig á því að Fishcor geti ekki borgað laun starfsmanna sinna. Fishcor fær kvóta sem þeir borga ekki fyrir á meðan önnur félög í sjávarútveginum þurfa að borga fyrir kvótann. Heimildarmaðurinn veltir því fyrir sér hvers vegna Fishcor geti ekki borgað launin þegar þeir eru með minni kostnað þegar kemur að kvótanum. „Hvernig Fishcor getur ekki haldið uppi viðskiptum sínum er stór ráðgáta,“ sagði heimildarmaðurinn.
„Það er eitthvað virkilega mikið að hérna og það þarf að rannsaka það.“
