Allt frá því að Sovétríkin réðust á Finnland í upphafi síðari heimsstyrjaldarinnar hafa Finnar viljað vera við öllu búnir. Af þeim sökum hafa þeir komið sér upp miklum birgðum af lyfjum, lækningabúnaði af ýmsum tagi, matvælum og hráefnum.
Samkvæmt umfjöllun New York Times eiga Finnar marga leynilegar birgðageymslur sem eru fullar af ýmsum nauðsynjum. Finnar skýra ekki frá staðsetningu birgðageymslanna né hvað er í þeim. Þetta er flokkað sem ríkisleyndarmál.
Tomi Lounema, yfirmaður finnsku neyðarbúnaðarstofnunarinnar, sagði í samtali við New York Times að það væri í eðli Finna að vera undirbúnir. Hann sagði jafnframt að fyrir tveimur vikum hafi verið byrjað að sækja lækningatæki og ýmsan búnað fyrir heilbrigðisstarfsfólk í birgðageymslurnar, til dæmis munnbindi. Þau séu gömul en þjóni hlutverki sínu.
Grunnurinn að þessum birgðageymslum var lagður á sjötta áratugnum þegar kalda stríðið blossaði upp. Finnar horfðu óttaslegnir í austur þar sem Sovétríkin höfðu þanist mikið út í kjölfar síðari heimsstyrjaldarinnar. Aðalflutningsleiðin til og frá Finnlandi var þá og er enn um Eystrasaltið þar sem Rússar eru nú áberandi og standa sterkir að vígi.
Lounema sagði að af þessum sökum hafi Finnar viljað vera öruggir um að þeir ættu alltaf nægar birgðir ef ný vandamál kæmu upp.
