Eyjan Nieu í Kyrrahafinu er best land heims fyrir stjörnuskoðunarfólk til að stunda iðju sína. Landið hefur nú hlotið viðurkenningu International Dark-Sky Association (IDA) sem besta landið til þessarar iðju. Samtökin vinna að því að draga úr ljósmengun og gefa fólki tækifæri til að sjá stjörnurnar á himninum.

Þetta kemur fram í fréttatilkynningu frá IDA. Samtökin hafa áður veitt mörgum svæðum viðurkenningu fyrir að henta vel til stjörnuskoðunar en þetta er í fyrsta sinn sem heilt land fær þessa viðurkenningu.

Niue er lítil eyja þar sem aðeins um 1.600 manns búa og því er ekki mikil ljósmengun þar. Yfirvöld hafa samt sem áður gert sitt besta til að draga úr ljósmengun. Meðal annars hafa sparperur verið settar í alla ljósastaura til að draga úr birtunni frá þeim. Niue er sjálfstjórnarlýðveldi í frjálsu ríkjasambandi við Nýja-Sjáland. Nýja-Sjáland sér um utanríkismál Niue og allir íbúar Niue eru nýsjálenskir ríkisborgarar.

Fáir ferðamenn koma til Niue enda ekki hlaupið að því að komast þangað. Það er flogið þangað tvisvar í viku frá Auckland á Nýja-Sjálandi.