Á mánudaginn lagðist U.S.N.S. Comfort, sjúkraskip frá bandaríska flotanum, að bryggju í New York til að létta álaginu á sjúkrahúsin í borginni en þar er ástandið skelfilegt vegna COVID-19 faraldursins. Á fimmtudaginn höfðu aðeins 20 sjúklingar verið fluttir um borð í skipið. Ástæðurnar eru öryggismál og skrifræði.

New York Times skýrir frá þessu.

„Ef ég á að vera hreinskilinn þá er þetta brandari. Við erum í erfiðum aðstæðum hér, þetta er vígvöllur.“

Sagði Michael Dowling, forstjóri Northwell Health sem eru samtök flestra sjúkrahúsa í borginni.

Þegar Comfort var sent til New York var sagt að það ætti að létta á sjúkrahúsum borgarinnar með því að taka við sjúklingum sem ekki eru smitaðir af COVID-19. Til að koma í veg fyrir að COVID-19 smit berist um borð þarf fyrst að leggja sjúklingana formlega inn á sjúkrahús í borginni þar sem rannsakað er hvort þeir séu smitaðir. Síðan er hægt að fara að huga að því að senda þá til Comfort. Þetta eykur auðvitað álagið á sjúkrabílaþjónustu borgarinnar sem hefur fyrir í nægu að snúast.

Ekki má flytja sjúklinga um borð sem eru með einhvern af 49 ákveðnum sjúkdómum sem eru skilgreindir sérstaklega. COVID-19 er einn af þeim.