76 ára kona frá suðurhluta Ástralíu lést nýlega þegar hani hennar réðst á hana þegar hún var að safna eggjum í hænsakofanum sínum. Haninn goggaði í hana og gerði gat á æðahnút sem orsakaði mikla blæðingu sem ekki var hægt að stöðva.

News.com.au skýrir frá þessu. Fram kemur að margir áverkar hafi verið á líkinu en það hafi verið fyrrnefnd blæðing sem varð henni að bana. Áströlsk yfirvöld hafa nú í kjölfar málsins varað fólk við hættum sem geta stafað af dýrum sem virðast vera meinlaus með öllu.

Roger Byard, prófessor í réttarmeinafræði við háskólann í Adelaide, segir að málið sýni hversu viðkvæmt eldra fólk, sem er með æðahnúta, sé fyrir jafnvel bara einu höggu frá hana. Hann sagði sjaldgæft að hanar verði fólki að bana en það geti gerst að lítil dýr verði fólki að bana.

Hann hefur einnig komið að tveimur öðrum málum þar sem hanar urðu fólki að bana. Í öðru málinu var það 16 mánaða stúlka sem lést eftir að hani réðst á vinstri hlið líkama hennar en út frá árásinni myndaðist æðagúlpur í höfði hennar. Í hinu málinu lést tveggja ára drengur af áverkum sínum eftir að hani hafði ítrekað látið gogginn vaða í hann.