„Nesti? Aldrei. Mamma sendi okkur bara með krumpaðan bökunarpappír svo það liti út fyrir að við værum með nesti.“
Þetta er haft eftir „Agnesi“, nú 19 ára, í nýrri skýrslu frá norsku góðgerðarsamtökunum Kirkens Bymisjon. Norska ríkisútvarpið skýrir frá þessu og hefur eftir Adelheid Firing Hvambsal, aðalritara samtakanna, að fyrir mörg börn sé það fullt starf að leyna því að foreldrar þeirra séu fátækir.
Í skýrslunni kemur fram að mörg börn og ungmenni í Noregi búa við mjög þröngan kost. Mörg börn fara svöng í rúmið á kvöldin og margar fjölskyldur hafa ekki efni á að kaupa föt.
Um 100.000 börn alast upp í fátækum fjölskyldum í Noregi. Þar sem ástandið er verst, til dæmis Drammen og Osló, á þetta við um fimmta hvert barn. Barnafátækt hefur vaxið að umfangi í Noregi á undanförnum 20 árum.