Sól, strendur, fjöldi áhugaverðra staða og gómsætur matur. Þetta er meðal þess sem er að finna á Spáni og þetta virðist svo sannarlega virka vel því þriðja árið í röð hefur landið verið kjörið besta land heims til að ferðast til af World Economic Forum.

Fólk frá allri Evrópu og raunar allsstaðar að úr heiminum flykkist til Spánar árlega og það er greinilega engin tilviljun.

Frakkland er í öðru sæti listans og Þýskland í því þriðja. En það er rétt að hafa í huga að listinn er byggður á mörgum ólíkum þáttum, þar á meðal eru öryggi, innviðir, gistimöguleikar og hvað fólk fær fyrir peningana sína. CNN skýrir frá þessu.

Í heildina er lagt mat á 90 mismunandi þætti og þeir skiluðu Spáni, Frakklandi og Þýskalandi í þrjú efstu sætin. Þar á eftir koma Bandaríkin og Japan. Á botninum sitja meðal annarra Jemen, Líbería og Búrúndí.

Þeir sem leggja mikla áherslu á heilbrigði og hreinlæti ættu að fara til Austurríkis sem skorar hæst í þessum þáttum. Þeir sem vilja vera í öruggu umhverfi ættu hins vegar að fara til Finnlands, Óman eða Íslands en í þessum löndum er öryggi ferðamanna mikið.