Inga Sæland, mennta- og barnamálaráðherra, er hlynnt því að framhaldsskólar byrji ekki of snemma á morgnana. Góður svefn sé mikilvægur hluti af líðan nemenda.

Þetta kemur fram í svari Ingu við fyrirspurn Dags B. Eggertssonar, þingmanns Samfylkingar, um upphaf skóladags í framhaldsskólum. En Dagur hefur viljað fresta byrjun skóladags vegna þess að rannsóknir sýna að stærstur hluti framhaldsskólanema fái ekki nægan nætursvefn. Það hafi meðal annars áhrif á námsárangur.

„Ráðherra er mjög umhugað um velferð nemenda og er góður svefn mikilvægur hluti af líðan þeirra og námsgetu. Því er ráðherra hlynntur því að framhaldsskólar hefjist ekki of snemma og telur það vel koma til greina að framhaldsskólar hafi sveigjanlegra upphaf skóladags,“ segir í svari Ingu.

Vísað er í Handbók um geðrækt í framhaldsskólum þar sem fjallað er um ávinning þess að seinka upphafi skóladagsins um 30 til 60 mínútur. Rannsóknir sýndu fram á jákvæðar breytingar þess að seinka upphafi skóladags frá 7:45 og 8:00 til 8:30 og 9:00.

„Jafnframt eru framhaldsskólar í handbókinni hvattir til að skoða það af alvöru að seinka upphafi skóladags í því skyni að stuðla að betri heilsu og líðan nemenda. Vert er að nefna að fjölmargir framhaldsskólar hafa þegar seinkað upphafi skóladags af framangreindum ástæðum,“ segir Inga.

Hefur hún ekki átt formlegt samráð eða samtöl um málið en framhaldsskólum hafi sjálfum verið falið að bera ábyrgð á forvarnarstarfi og setja sér forvarnarstefnu sem skuli birt opinberlega. Þá hafi ráðuneytið stutt við verkefni embættis landlæknis um heilsueflandi framhaldsskóla.