Gísli Einarsson, læknir og íbúi í Breiðagerði, varar við nýrri staðsetningu Kaffistofu Samhjálpar í húsnæði við Grensásveg 46.
Miklar umræður og deilur hafa verið um áformin og margir íbúar í hverfinu lýst yfir áhyggjum af þessari staðsetningu kaffistofunnar vegna nálægðar við skóla og fjölmörg börn í hverfinu.
Gísli Einarsson segir í aðsendri grein í Morgunblaðinu í dag að áhyggjur íbúa af kaffistofunni snúist ekki um samkennd enda hafi margir íbúar í hverfinu stutt við starfsemi Samhjálpar árum saman og vilji gera það áfram. En þeir gera alvarlegar athugasemdir við staðsetninguna. Gísli skrifar:
„Í kynningu Samhjálpar kemur fram að kaffistofan sé eingöngu ætluð fullorðnum og að þangað sæki meðal annars fólk sem glímir við fíknivanda og alvarleg andleg og líkamleg veikindi. Það vekur því spurningar að slík starfsemi sé fyrirhuguð í næsta nágrenni við tvo grunnskóla, Breiðagerðisskóla og Hvassaleitisskóla, þar sem samtals eru um 600 börn, í innan við 300 metra fjarlægð.
Mikil umferð barna er á þessu svæði, bæði milli skóla og til og frá heimilum. Foreldrar hafa því eðlilega áhyggjur af öryggi barna sinna í ljósi þeirrar starfsemi sem fyrirhuguð er á staðnum. Þessar áhyggjur eru raunverulegar og byggjast á aðstæðum sem ekki verður litið fram hjá.“
Hann rifjar upp að Umhverfis- og skipulagsráð hafi samþykkt breytingarnar á húsnæðinu seint í mars, sem hefðbundið mál um veitingarekstur. Segir hann furðulegt að ekki hafi verið tekin umræða um þær fjölmörgu athugasemdir sem íbúar hafi sett fram. Málið snúist ekki um skipulagsmál heldur um áhrif á nærsamfélag og daglegt líf fjölskyldna á svæðinu. Hann segir:
„Ágreiningurinn snýst því ekki um vilja til að hjálpa heldur um hvernig best sé að gera það með hagsmuni allra í huga. Það er eðlilegt að leita lausna sem bæði tryggja mikilvæga þjónustu og taka tillit til öryggis og velferðar íbúa, ekki síst barna.“
