Sigríður Á. Andersen þingmaður Miðflokksins og fyrrum þingmaður og ráðherra Sjálfstæðisflokksins hnýtir all hressilega í fyrrverandi flokkssystur sína Áslaugu Örnu Sigurbjörnsdóttur í færslu á samfélagsmiðlinum X. Eins og kunnugt er hefur Áslaug Arna lýst yfir framboði sínu til formennsku í Sjálfstæðisflokknum. Sigríður segir þau orð Áslaugar að kalla Flokk fólksins ekki stjórnmálaflokk af því hann sé ekki skráður sem slíkur hjá hinu opinbera lýsi miklu blæti fyrir skriffinnsku.
Í færslunni vitnar Sigríður í orð Áslaugar í viðtali við Bítið á Bylgjunni í morgun. Sigríður skrifar:
„Mál sem kemur upp núna er þetta styrkjamál til flokksins, sem er auðvitað ekki stjórnmálaflokkur enn þá.“ -Áslaug Arna Sigurbjörnsdóttir þingmaður D. Að halda því fram að flokkur sem situr á Alþingi sé ekki „stjórnmálaflokkur“ af því að eyðublaði hefur ekki verið skilað til ríkisins lýsir miklu blæti til skriffinnsku.“
Í athugasemd tekur Halldór Armand Ásgeirsson rithöfundur undir með Sigríði:
„Sammála. Um leið er svona lögtæknihyggja/formsatriðaobsessjón („voru blýantarnir nógu vel yddaðir?“) í takt við þá þjóðlegu hefð að tala aldrei um aðalatriðið, sem í þessu tilviki er sú staðreynd að íslenskir stjórnmálaflokkar fá óáreittir að moka almannafé í sjálfa sig.“
Í viðtalinu í Bítinu viðhafði Áslaug Arna þessi orð sem Sigríður vitnar til um Flokks Fólksins. Var Áslaug Arna þá að vísa til þess sem fram hefur komið í fjölmiðlum undanfarna daga um að Flokkur fólksins hafi þegið framlög úr ríkissjóði þrátt fyrir að hafa ekki verið á skrá Skattsins yfir stjórnmálasamtök en lög, frá 2021, kveða á um að slík skráning sé skilyrði fyrir því að hljóta slík framlög.
Áslaug Arna sagði í Bítinu að Flokkur fólksins hljóti að þurfa að endurgreiða ríkinu þá fjármuni sem flokkurinn hefði fengið greidda.
Eftir að viðtalið var sent út greindi Vísir frá því að árið 2022 hefði Sjálfstæðisflokkurinn fengið 167 milljónir króna frá ríkinu áður en flokkurinn gekk formlega frá skráningu á skrá Skattsins yfir stjórnmálasamtök. Hvort Áslaugu Örnu finnist að hennar flokkur eigi að endurgreiða þessa upphæð á eftir að koma í ljós en samkvæmt ársreikningi flokksins fyrir árið 2023 ætti hann að hafa efni á því en eigið fé flokksins í lok þess árs nam 1,4 milljörðum króna.
„Mál sem kemur upp núna er þetta styrkjamál til flokksins, sem er auðvitað ekki stjórnmálaflokkur enn þá.“ -Áslaug Arna Sigurbjörnsdóttir þingmaður D.
Að halda því fram að flokkur sem situr á Alþingi sé ekki „stjórnmálaflokkur“ af því að eyðublaði hefur ekki verið skilað til…
— Sigríður Á. Andersen (@siggaandersen) January 27, 2025
