Einar Hrafn Stefánsson hefur verið ráðinn til nýsköpunar- og fjártæknifyrirtækisins Blikk í starf markaðsstjóra.

Einar hefur víðtæka reynslu úr markaðsgeiranum, eins og kemur fram í tilkynningu. Hann starfaði áður hjá Píeta samtökunum, Íslenska dansflokknum og Ölgerðinni. Einnig hefur hann starfað sem stundakennari í markaðssetningu og kynningarmálum við Háskólann á Bifröst.

Einar er hvað þekktastur fyrir störf sín í tónlist meðal annars í hljómsveitunum Vök og Hatara. Síðustu misseri hefur hann starfað náið með palestínska tónlistarmanninum Bashar Murad. Haustið 2019 fékk hann viðurkenningu frá JCI Ísland fyrir framlag sitt til menningarstarfsemi sem einn af „framúrskarandi ungum Íslendingum“.

Hin byltingakennda greiðslulausn Blikk byggir á bankamillifærslum í stað kortafærslna, svo kölluð reikning-í-reikning greiðslulausn. Með Blikk verða allir milliliðir óþarfir þar sem greiðslur og uppgjör á eru í rauntíma og því mun skilvirkari, ódýrari og einfaldari lausn (jafnframt því að vera traust og áreiðanleg).

Með Blikk er hægt að greiða fyrir vörur og þjónustu á staðnum, í netverslun, smáforriti verslana auk þess að greiða áskriftir og reikninga á mun hagstæðari hátt en í hefðbundnum korta-og bankaviðskiptum.

Greiðslulausn Blikk hefur verið ýtt úr vör og er til notkunar hjá Acro verðbréfum og Domino’s.