Nýjar aðferðir við að innheimta stöðumælasektir hafa stóraukið afköst stöðumælavarða. Þetta segir fjölmiðlamaðurinn Egill Helgason, sem býr í miðborg Reykjavíkur. Hann hefur lent illa í því undanfarið.
„Varúð! Leikurinn hefur gerbreyst,“ segir Egill í færslu á Facebook. „Nú er það svo að stöðumælaverðir þurfa ekki lengur að skrifa miða til að setja bíla sem þeir sekta, heldur eru þeir með þartilgerða miða sem þeir líma á rúðuna. Þetta veldur því að þeir eru miklu fljótari í förum, yfirferð þeirra er meiri – og líkurnar á að fá sekt hafa stóraukist.“
Í upphafi mánaðar var tilkynnt að miðar með stöðumælasektum heyrðu brátt sögunni til. Það er að Bílastæðasjóður myndi hætt að prenta út sektir og setja þær undir rúðuþurrkur bíla. Hið nýja fyrirkomulag er að fólk fái sektirnar sendar í heimabanka og á ísland.is.
Hins vegar er gefin sex vikna aðlögunartími, það er að fólk fái miða á rúðuna þar sem fram kemur að fólk hafi fengið sekt.
Egill lýsir því að hann hafi fengið að kenna á þessu og upplýsingarnar séu af skornum skammti.
„Sjálfur hef ég lent í þessu tvisvar síðustu daga, borgaði með appinu Easy Park en var aðeins of seinn í bílinn í bæði skiptin. Og fékk sektir,“ segir hann. „Bara til að láta ykkur vita að það eru engin grið. Maður þarf svo að fara í heimabanka eða Ísland.is til að athuga hversu þunga sekt maður fær, það eru engar upplýsingar lengur á miðanum.“
