Hjálmar Árnason, fyrrverandi framkvæmdastjóri verktakafyrirtækisins H28, hefur verið sakfelldur fyrir stórfelld skattsvik. Dómur yfir honum var kveðinn upp í Héraðsdómi Reykjaness þann 6. febrúar síðastliðinn.
Er þetta í annað sinn á stuttum tíma sem Hjálmar er dæmdur fyrir skattsvik vegna athafna í rekstri sama fyrirtækisins. Hann hlaut í apríl í fyrra 15 mánaða skilorðsbundinn dóm fyrir brot í rekstri sama fyrirtækis auk 127 milljóna króna sektar. En að þessu sinni var Hjálmar dæmdur fyrir önnur skattsvik í rekstri H28.
Var hann ákærður fyrir að hafa vanrækt að greiða virðisaukaskatt og staðgreiðslu skatta frá því í desember árið 2019 og fram til fyrstu mánaða ársins 2021. Samtals nema þessi skattsvik rétt rúmlega 100 milljónum króna.
Hjálmar játaði sök fyrir dómi. Það er virt honum til refsilækkunar, en ítrekað brot er honum til refsiauka. Niðurstaðan er 12 mánaða skilorðsbundið fangelsi og himinhá sekt: Tæplega 207 milljóna krónur. Hjálmar þarf að sitja í eitt ár í fangelsi ef hann greiðir ekki sektina innan fjögurra vikna.
