Í apríl voru rúmlega þúsund manns skráðir án atvinnu í ferðaþjónustunni. Fólk sem starfaði í greininni hefur ekki skilað sér aftur til starfa, eins og vonast var til, eftir að mesti þrótturinn fór úr heimsfaraldri kórónuveirunnar.

Morgunblaðið skýrir frá þessu í dag. Hefur blaðið eftir Unni Sverrisdóttur, forstjóra Vinnumálastofnunar, að staðan sé svipuð hjá vinnumiðlunum á Evrópska efnahagssvæðinu. Á fundi stjórnenda vinnumiðlana í síðustu viku hafi komið fram að fólk sem starfaði í ferðaþjónustu væri ekki að skila sér að fullu út á vinnumarkaðinn.

Samtök ferðaþjónustunnar telja að ráða þurfi 7.000 til 9.000 manns til starfa í greininni á þessu ári og því næsta.

Samkvæmt tölum frá Vinnumálastofnun voru rúmlega 9.000 manns án atvinnu í apríl. Þar af rúmlega 1.000 í gistingu og ferðaþjónustu.