Mörg verkefni komu á borð lögreglu í nótt, ef marka má dagbók lögreglu. Þar er meðal annars greint frá svakalegri eftirför lögreglu, og tveimur líkamsárásum í Miðbænum.

Eftirförin átti sér stað í Grafarvogi, og hófst eftir að ökumaður, sem var kona, stöðvaði ekki bifreið sína eftir að lögregla gaf merki um það, með bláum ljósum og hljóðmerkjum. Ökumaðurinn gekk svo langt að keyra utan vegar, yfir gras og eftir gangstéttum. Að lokum nam bíllinn staðar, en þá hljóp konan í burtu. Það gekk þó ekki og var hún handtekin fyrir að fara ekki að fyrirmælum lögreglu og umferðarlagabrot.

Í miðbænum áttu sér stað tvær líkamsárásir. Annars vegar var maður í annarlegu ástandi handtekinn á veitingastað fyrir að ráðast á dyravörð, en sá var vistaður í fangageymslu sökum ástands.

Hins vegar slógu tveir menn annan mann ítrekað í höfuðið og hlupu síðan á brot. Þolandinn var fluttur með sjúkrabifreið á Bráðadeild til aðhlynningar.

Í dagbók lögreglu er einnig greint frá því að tveir menn hafi verið handteknir í verslunarmiðstöð, grunaðir um þjófnað á fatnaði. Þá var vegabréfum og fartölvum stolið í innbroti í miðbænum.