Spenna er nú innan borgarstjórnarflokks Samfylkingarinnar vegna fyrirhugaðrar ferðar Dags B. Eggertssonar, borgarstjóra og oddvita flokksins, til Mexíkó. Samkvæmt heimildum DV er ferðin á dagskrá 30. nóvember til 3. desember næstkomandi og mun Dagur hleypa af stokkunum forvarnarverkefni fyrir ungmenni sem byggir nálgun sína á reynslu af slíkum verkefnum hér á landi.

Samkvæmt upplýsingum DV mun héraðsstjóri Guanajuato-héraðs fara fyrir ráðstefnunni ytra og var fulltrúa Reykjavíkurborgar boðið sérstaklega.

Formaður velferðarráðs Reykjavíkurborgar er Heiða Björg Hilmisdóttir, varaformaður Samfylkingarinnar og varaoddviti flokksins í borginni. Herma heimildir Orðsins að mörgum hefði þótt eðlilegra að Heiða tæki að sér Mexíkóferðina enda falla forvarnarmál tryggilega undir hennar sombrero. Er það þannig ekki bara upplifun sumra að ferðin sé höfð af Heiðu, heldur að Dagur sé að skreyta sig með fjöðrum Heiðu úr velferðarmálunum.

Dagur verður reyndar ekki einn á ferð, en á ráðstefnunni mun Ólafur Ragnar Grímsson, fyrrverandi forseti Íslands, einnig vera í hópi þeirra sem opna ráðstefnuna.