RÚV greindi frá því fyrir rúmri viku að ungur hettumávur hafi fundist á Borgarfirði eystra en mávurinn gat ekki flogið. Mávurinn var illa á sig kominn en svo virtist vera sem hann hafi verið málaður með sterku lakki.
Þá var mávurinn merktur en talið er að merkið hafi verið heimatilbúið og því er líklegt að einhver hafi haft mávinn sem gæludýr. Ásta Steingerður Gestsdóttir, íbúi á Borgarfirði, birti myndir af fuglinum en hún segir að ef mávurinn hafi verið málaður með sterku lakki þá flokkist það undir dýraníð.
Vending hefur orðið í málinu en Matvælastofnun hefur óskað eftir opinberri rannsókn lögreglunnar á Austurlandi á málinu. Þetta kemur fram í tilkynningu frá stofnuninni.
„Rétt er að vekja athygli á því að ef grunsemdir vakna um brot á lögum um velferð dýra nr. 55/2013 ber þeim sem þess verður var að tilkynna það Matvælastofnun eða lögreglu svo fljótt sem auðið er,“ segir í tilkynningunni. „Brot gegn lögum um velferð dýra sæta aðeins rannsókn lögreglu að undangenginni kæru Matvælastofnunar.“
