Kristín Snæfells Arnþórsdóttir er látin. Hún var fædd þann 4. október árið 1950. Kristín háði harða baráttu við krabbamein síðastliðin ár.
Minningarathafnir hafa viða verið haldnar um þessa mögnuðu konu, meðal annars í Seljakirkju, Ábæjarkirkju og á vegum AA-samtakanna. Kristín var meðal annars stofnandi Dyngjunnar, áfangaheimilis fyrir konur sem lokið höfðu áfengismeðferð.
Á unga aldri gerði hljómsveitin Stuðmenn Kristínu ódauðlega en hún var kölluð „Stína stuð“ í laginu „Út á stoppistöð“ á fyrstu plötu Stuðmanna.
Kristín stríddi við erfiðleika og áföll allt frá barnæsku sem hún gerði skil í ævisögu sinni, Sporin í sandinum, sem kom út árið 2003 og vakti töluverða athygli. Ennfremur segir hún frá baráttu sinni við Bakkus, þar sem hún hafði betur, en henni tókst að breyta lífi sínu með hjálp AA-samtakanna.
Í tilkynningu um andlát Kristínar í lokuðum Facebookhópi – Sporin í sandinum – segir Guðbjörg Elísa Hafsteinsdóttir, dóttir hennar: „Huggun er harmi gegn að hún er komin í faðm Guðs þar sem enginn sársauki né sjúkdómar eru og að mamma hélt í húmorinn og jákvæðnina allt til enda.“