Donald Trump, Bandaríkjaforseti, flutti ávarp fyrir nokkrum mínútum í Hvíta húsinu. Hann fór yfir úrslitin og stöðu atkvæðatalningar í nokkrum ríkjum. Hann sagði að verið væri að „svindla rosalega“ á Bandaríkjamönnum en útskýrði það ekki nánar. Svo virðist sem forsetinn sé ekki viss um að ná endurkjöri og því ræddi hann um hæstarétt og að hann muni leita til hans um að láta stöðva talningu atkvæða auk þess að koma með fullyrðingar um kosningasvindl sem hann studdi ekki frekar.
„Við vinnum allt. Þeir geta ekki náð okkur,“
sagði hann og átti þar við að Demókratar geti ekki náð Repúblikönum í atkvæðatalningunni.
„Við vinnum allt. Úrslitin eru frábær og við erum tilbúin að fara út og fagna svona fallegum og góðum hlut,“
sagði hann. Þegar hann flutti ræðuna var staða frambjóðendanna nokkuð jöfn, Biden hafði tryggt sér 225 kjörmenn og Trump 213. 270 kjörmenn þarf til að sigra. Enn er beðið eftir niðurstöðu talningar í nokkrum kjördæmum en hún gæti dregist á langinn vegna fjölda póstatkvæða.
