Á Suðurnesjum er öllu heitu vatni dreift frá Svartsengi. Ef náttúruhamfarir á borð við eldgos eða jarðskjálfta verða á svæðinu og dreifing á heitu vatni þaðan stöðvast er engin varaáætlun til um hvernig brugðist verður við.

Fréttablaðið skýrir frá þessu í dag. Haft er eftir Júlíusi Jóni Jónssyni, forstjóra HS Veitna, að þetta sé flókið verkefni og illmögulegt sé að undirbúa allar sviðsmyndir.

„Það er helst heita vatnið sem við óttumst. Vandinn er ekki eins mikill ef kalda vatnið færi því við getum nálgast það úr öðrum vatnsbólum skammt frá. Það yrðu þó vissulega truflanir til skamms tíma. Enn sem komið er eru engar áætlanir uppi um hvernig við leysum vandann ef framleiðsla í Svartsengi myndi stöðvast.“

Er haft eftir honum.

Auk þess að sjá Grindavík, Reykjanesbæ, Garði og flugstöðvarsvæðinu fyrir ferskvatni eiga HS Veitur og reka dreifikerfi fyrir heitt vatn í öllum sveitarfélögunum á Suðurnesjum. Gjá í hrauninu í Lágum, sem er um þrjá kílómetra frá Svartsengi, er aðalvatnstökusvæðið. Þar er ferskvatn tekið og dælt í Svartsengi þar sem það er síðan hitað upp með jarðgufu.

Fréttablaðið hefur eftir Júlíusi að mikilvægt sé að halda ró sinni vegna málsins því afar litlar líkur séu á að allt fari á versta veg og framleiðslan í Svartsengi myndi stöðvast. Það þurfi þó að ræða viðbrögð við slíkum hamförum.