„Við getum ekki sagt það, Margrét, við getum ekki sagt að fólk sem er trans eða hán sé frík,“ sagði Máni Pétursson, þáttastjórnandi Harmageddon, eftir þessi ummæli Margrétar. Margrét segir að Jesú hafi ekki verið svona í alvörunni og því sé hann frík á þessari mynd. „Hann er bæði með kvenmannsbrjóst og karlmannsskegg og svo er hann með varalit. Þetta er ekki neitt í samræmi við það hvernig Jesú kristur sjálfur var.“
Frosti spyr þá Margréti hvernig hún geti vitað hvernig Jesú hafi litið út, þar sem rúmlega 2000 ár eru liðin síðan hann er sagður hafa gengið um á þessari jörð. „Jesú var karlmaður og hann var sonur guðs. Það eru gífarlega mikið af lýsingum af honum í biblíunni og þar er ekkert sem gefur til kynna að hann hafi litið á sig sem eitthvað annað en karlmann,“ segir Margrét.
Samkvæmt Margréti er Þjóðkirkjan með þessari mynd og texta sem fylgir henni að segja að kirkjan sé ekki einungis fyrir hvíta og gagnkynjaða karlmenn. „Þeir [hvítir gagnkynhneigðir karlmenn] virðast vera rót alls ills og nú er þessi PC fnykur búinn að færa sig yfir í Þjóðkirkjuna,“ segir hún.
Þáttastjórnendurnir segja þá við Margréti að hún sé að fara með rangt mál. Markmiðið með myndinni hafi verið að sleppa staðalmyndum og sýna að kristur sé allra en ekki bara fyrir hvíta gagnkynjaða karlmann.
Margrét segir þó að það þurfi ekki að breyta Jesú svo þetta komi í gegn. „Það þarf ekki að afskræma Jesú krist og úrkynja hann til að koma þeim skilaboðum til skila. Það er röng nálgun,“ segir Margrét og tekur fram að fólkið sem er hvað mest ánægt með myndina sé það sem er trúlaust. „Ég get ekki betur séð en að Þjóðkirkjan sé þarna að skemmta skrattanum,“ segir hún.
Myndin sem um ræðir tengist auglýsingu fyrir sunnudagaskóla kirkjunnar sem er fyrir börn. Margrét hefur áhyggjur af þessu. „Börnin eru viðkvæmur hópur,“ segir hún og fullyrðir að Þjóðkirkjan ætli að ganga lengra með myndina og nota hana í auglýsingaherferð. „Þau ætla að festa þessa mynd á strætó,“ segir hún.
