Fréttablaðið skýrir frá þessu í dag og vísar í nýja rannsókn Drífu Jónasdóttur doktorsnema við læknadeild Háskóla Íslands. Rannsóknin var unnin út frá gögnum frá Landspítalnum. Samkvæmt þeim komu 1.454 konur á spítalanna frá 2005-2014 vegna ofbeldis sem þær höfðu orðið fyrir frá maka sínum.
Tæplega 93 prósent kvennanna leituðu á bráðamóttöku og voru 3 prósent þeirra lagðar inn.
„Þetta er mikill fjöldi kvenna en þetta eru samt bara konurnar sem segja beint frá því að hafa orðið fyrir ofbeldi.“
Er haft eftir Drífu.
Sjónum var beint að líkamlegum áverkum í rannsókninni og hefur Fréttablaðið eftir Drífu að stærstur hluti áverkanna hafi verið yfirborðsáverkar.
„Konurnar koma með áverka á spítalann meðal annars vegna þess að þær hafa verið kýldar, slegnar, sparkað hefur verið í þær, þeim hrint, þær teknar kyrkingartaki og dregnar um á hárinu. Tegundir áverka eru til dæmis yfirborðsáverkar, tognanir, sár og beinbrot.“
Er haft eftir henni og að flestir áverkarnir hafi verið á höfði, hálsi og andliti og handleggjum kvennanna.
