Leikararnir Justin Baldoni og Blake Lively hafa náð sáttum eftir mikil átök í tengslum við kvikmyndina It Ends With Us. Málið verður því ekki tekið frekar fyrir af dómstólum en aðalmeðferð átti að hefjast þann 18. maí.
Lively sakaði Baldoni um kynferðislega áreitni og niðurlægjandi framkomu á tökustað myndarinnar og sakaði leikarann, sem jafnframt var leikstjóri myndarinnar, um ófrægingarherferð.
Baldoni sneri vörn í sókn og sakaði leikkonuna á móti um mannorðsmorð. Eins höfðaði hann mál gegn miðlinum The New York Times fyrir að hafa birt frétt um ásakanir Lively.
Þær vendingar urðu svo fyrir rúmum mánuði að dómari vísaði frá 10 af 13 kæruliðum leikkonunnar, þar með talið ásökunum um áreitni og meiðyrði. Eftir stóðu kæruliðir sem snerust um meint samningsbrot og ófrægingarherferð. Sami dómari vísaði alfarið frá máli Baldoni gegn leikkonunni.
Sáttin hefur komið mörgum á óvart en lögmaður Baldoni segir að leikarinn sé ljómandi sáttur með niðurstöðuna.
„Þetta var mikill sigur,“ sagði lögmaðurinn Bryan Freedman í samtali við TMZ Live. „Þetta er stórkostlegt tækifæri og ég held að maður láti slíkt ekki fram hjá sér fara.“
Leikararnir gáfu út sameiginlega yfirlýsingu á dögunum þar sem bæði sögðust stolt af kvikmyndinni, þrátt fyrir allt dramað. Áskoranir hafi komið upp við töku myndarinnar og Baldoni segir að Lively hafi haft fullan rétt á því að viðra áhyggjur sínar af framkomu í sinn garð.
Freedman heldur því þó fram að ekki sé um eiginlega dómsátt að ræða. Hér sé um fullnaðarsigur að ræða þar sem dómari hafi vísað frá ásökunum um kynferðislega áreitni, meiðyrði og annað.
„Hann gat loksins dregið andann aftur. Að vera sakaður um kynferðislega áreitni með svona opinberum hætti er hræðilegt. Ég verð bara klökkur þegar ég hugsa um það sem hann gekk í gegnum því hann er svo góð manneskja og berst fyrir öllu því sem er gott í fari kvenna og styður konur.“
