FOX Sports hefur kynnt óvenjulegt starf í aðdraganda heimsmeistaramótsins í knattspyrnu, þar sem einn heppinn stuðningsmaður fær greitt fyrir að horfa á alla leiki mótsins.
Um er að ræða starf sem kallast „Chief World Cup Watcher“, en sá sem hlýtur starfið fær um 50.000 dollara í laun fyrir að fylgjast með öllum 104 leikjum mótsins. Verkefnið er unnið í samstarfi við atvinnuvefinn Indeed.
Starfið felst í því að horfa á alla leiki Heimsmeistaramótsins, sem fer fram í Bandaríkjunum, Kanada og Mexíkó í sumar , yfir 39 daga tímabil frá 11. júní til 19. júlí.
Viðkomandi mun fylgjast með leikjunum úr sérútbúnu áhorfssvæði á Times Square í New York City, þar sem þúsundir ferðamanna og stuðningsmanna fara um dag hvern.
Auk þess þarf viðkomandi að deila efni á samfélagsmiðlum og miðla upplifun sinni af mótinu til áhorfenda.
„Þetta verður sögulegt mót og kallar á jafn einstakt starf,“ sagði Robert Gottlieb, markaðsstjóri FOX Sports.
Starfið hefur þegar vakið mikla athygli og má búast við mikilli samkeppni um stöðuna.
