Lögreglunni á Höfuðborgarsvæðinu bárust nokkrar tilkynningar um þrítuga konu sem hegðaði sér undarlega í Langholtshverfi. Lögregla fann konuna og reyndist hún í annarlegu ástandi. Þetta kemur fram í dagbók lögreglu. 11 mál voru bókuð frá því fimm í morgun til klukkan ellefu.
„Nokkar tilkynningar bárust lögreglu um þrítuga konu, undarlega í háttum, í hverfi 104. Að lokum fannst konan í annarlegu ástandi. Hún er grunuð um þjófnað á nokkrum stöðum (heimahúsi og fyrirtæki). Konan var handtekin og vistuð í fangageymslu í þágu rannsóknar málsins. Hún hafði meðferðis ýmsa muni sem taldir eru þýfi.“
Lögregla var aftur kölluð út í Langholtshverfi vegna umferðarslyss í Skeiðarvogi. Þar hafði ökumaður misst stjórn á bíl sínum er hann tók krappa beygju og endaði hann með að fara út af veginum og hafnaði í trjágróðri. Eftir slysið var bifreiðin óökufær og flytja þurfti farþega á slysadeild. Áverkar eru þó taldir minniháttar.
Í Miðbænum var kallað eftir aðstoð lögreglu vegna ferðamanns sem hafði læst sig inni á almenningssalerni. Lögreglu tókst að frelsa ferðamanninn og hafði samband við Reykjavíkurborg til að gera þeim grein fyrir að hurð salernisins væri biluð.
