Söfnun hefur verið hrint af stað fyrir fjölskyldu Sigurðar Birgis Baldvinssonar sem lést úti fyrir Þjórsárósum síðastliðið laugardagskvöld. Sigurður var 43 ára en hann lætur eftir sig sambýliskonu sem er komin 9 mánuði á leið með þeirra annað barn. Fyrir eiga þau dóttur sem er á fimmta ári. Þá átti Sigurður tvo syni sem eru 17 og 19 ára.

Vinir fjölskyldu Sigurðar standa fyrir söfnuninni inni á síðunni GoFundMe. Þar segir að Siggi, eins og hann var alltaf kallaður, hafi verið vel liðinn og kynnst mikið af góðu fólki í gegnum starf sitt en átti 49 sleðahunda og rak hundasleðafyrirtæki.

Siggi var mikill fjölskyldumaður. Nú standa sambýliskona hans og börn frammi fyrir stórum áskorunum á sama tíma og þau takast á við ólýsanlega sorg en Siggi var fyrirvinna fjölskyldunnar.

Mynd: GoFundMe

Peningarnir sem safnast fara beint til fjölskyldu Sigga. Þeir verða notaðir til að greiða útfararkostnað, dekka tekjutapið, halda fyrirtækinu gangandi og að ráða starfsmann í hans stað.

Á síðunni þar sem hægt er að styðja við bakið á fjölskyldu Sigurðar kemur jafnframt fram að sambýliskona hans eigi von á dreng í lok maí.

Hér er hægt að styrkja eiginkonu Sigurðar og börn þeirra.