Hann var tilnefndur til Grammy-verðlauna um morguninn fyrir lag sitt Sinners en síðar um daginn var hann handtekinn af lögreglunni í Atlanta.
Wave, sem heitir réttu nafni Rodarius Green, er grunaður um vopnalagabrot, vörslu fíkniefna og ógætilegan akstur. Þurfti hann að dúsa í fangageymslu aðfaranótt laugardags.
Verjandi rapparans segir að hann hafi verið ranglega stimplaður og ólöglega handtekinn, og ýjar að því að húðlitur hans hafi átt þar hlut að máli. Sagði hann að Wave hlakkaði til að sanna sakleysi sitt fyrir dómi þegar þar að kemur.
Wave er þrítugur en lagið sem hann er tilnefndur fyrir hljómaði í samnefndri kvikmynd sem frumsýnd var fyrr á árinu.
