„Um 1960 kom myndlistarmaður nokkur frá Spáni og settist að á Íslandi. Hann hét og heitir Baltasar Samper og eftir að hann ákvað að gerast íslenskur ríkisborgari lenti hann í miklu stappi við íslensk yfirvöld sem sögðu að samkvæmt íslenskum nafnalögum mætti hann alls ekki heita Baltasar.“

Þannig hefst örpistill eftir Illuga Jökulsson rithöfund á Facebook sem hann kallar fróðleiksmola dagsins. Þar greinir hann frá því þegar faðir Baltasars Kormáks leikstjóra kom til Íslands og vildi setjast hér að. Þess má geta að Baltasar eldri og Jökull Jakobsson faðir Illuga voru miklir vinir og nánir samstarfsmenn. Við gefum Illuga orðið:

„Það væri bara ekki íslenskt nafn, og hann yrði að taka upp nafnið Guðmundur eða Sigurður eða Jón eða eitthvað rammíslenskt. Þetta var heilmikið vesin hjá Baltasar, veit ég, en hann lét sig ekki og hélt áfram að heita Baltasar. Árið 1966 eignaðist hann dreng sem einnig var skírður Baltasar og fékk pilturinn með semingi að heita þessu „útlenska“ nafni. Þar með voru Baltasarar á Íslandi orðnir tveir. Eftir að Baltasar yngri varð frægur leikari og leikstjóri brá svo við að Baltasörum tók mjög að fjölga á Íslandi. Nú reiknast mér til að 169 Baltasarar séu á Íslandi, langflestir fæddir eftir árið 2000. Sá hlær best sem síðast hlær, gæti Baltasar eldri sagt.“