Ástralska leikkonan Margot Robbie á von á sínu fyrsta barni með eiginmanni sínum, kvikmyndagerðarmanninum Tom Ackerley.
Hjónin, sem bæði eru 34 ára, kynntust árið 2013 við tökur á kvikmyndinni Suite Francaise, sem gerist í seinni heimsstyrjöldinni, hún lék í myndinni og hann var aðstoðarleikstjóri. Þau urðu par árið 2014 og giftu sig árið 2016. Þau halda hjónabandinu að mestu utan sviðsljóssins og segir Robbie að lykillinn að því að halda hjónabandi á lífi í bransanum sem þau eru í sé að vera aldrei lengur aðskilin en þrjár vikur hámark.
Hjónin stofnuðu framleiðslufyrirtækið LuckyChap saman ásamt tveimur öðrum, þar á meðal æskuvinkonu Robbie, Sophia Kerr. LuckyChap hefur framleitt fjölda kvikmynda, þar á meðal myndirnar I, Tonya, Birds of Prey og Barbie. Robbie fór með hlutverk í þeim öllum og varð heimsfræg á síðasta ári fyrir aðalhlutverki sitt í þeirri síðastnefndu.
Næstu verkefni eru My Old A** með Aubrey Plaza, Maisy Stella, og Maddie Ziegler í aðalhlutverkum, ofurhetjumyndin Avengelyne með Olivia Wilde, kvikmynd byggð á tölvuleiknum The Sims og önnur byggð á borðspilinu Monopoly. Robbie verður næst í aðalhlutverki í kvikmyndinni A Big Bold Beautiful Journey ásamt Colin Farrell.
