Páskaegg eru skemmtileg leið til að gleðja aðra. Gómsætt súkkulaðið bráðnar í munni og málshátturinn getur hvort sem er gefið fyrirheit um framtíðina eða verið lýsandi fyrir þann sem flettir honum í sundur. Málshættir í eggjunum eru séríslenskt fyrirbæri en það að borða egg á páskum á sér langa sögu.
Að borða egg á páskum snerist fyrst og fremst um að minnast upprisu Jesús Krists og að nýtt líf væri að kvikna alls staðar í náttúrunni. Egg hafa um aldir verið táknmynd endurnýjunar og endursköpunar. Eggin voru einnig leið til að brjóta lönguföstu og í mörgum löndum mátti ekki borða þau frekar en kjöt meðan á fjörutíu daga föstunni stóð og sá siður að bera fram harðsoðin egg á páskadagsmorgun varð því leið til að fagna. Eggin urðu tákn upprisunnar, skurnin varð táknmynd innsiglis grafar Jesús og þegar skurnin var brotin kveikti það hugrenningatengsl við sögu Biblíunnar af því þegar konurnar vitjuðu grafar Krists hafði steininum verið velt frá og sá sem þar lá horfinn. Húsbóndinn á heimilinu blessaði jafnan eggin áður en þau voru borðuð.
Egg voru einnig ófáanleg yfir veturinn en að vori fóru hænur og aðrir fuglar aftur að verpa. Eggin voru þess vegna sérstakt góðgæti og munngát til að njóta. Fljótlega breiddist sá siður út að skreyta eggin. Þau voru lituð í alls konar litum með hjálp jurta og rauði liturinn táknaði blóð Krists. Síðan fóru börn að mála skurnina og skapa alls konar mynstur. Á nítjándu öld hófu svo súkkulaðigerðarmenn í Frakklandi að bjóða upp á súkkulaði mótað í eggjaform. Sá siður barst hingað með dönskum bökurum og fyrst mátti sjá súkkulaðiegg auglýst í auglýsingu frá Björnsbakaríi árið 1920. Hvenær farið var að setja málshætti inn í eggin er ekki ljóst en súkkulaðiverksmiðjurnar Siríus og Freyja fóru að framleiða egg í byrjun fjórða áratugar síðustu aldar og þá má ætla að málshættirnir hafi ratað inn í eggin.
Það er sérlega skemmtilegur siður og ýmist er málshátturinn talinn endurspegla persónuleika þess sem fær hann eða spá fyrir um framtíðina. Hvort sem menn leggja eitthvað upp úr því eða ekki er alla vega öruggt að íslensk börn læra af þessu og sennilega hafa mörg þeirra lært að þekkja og nota ýmsa málshætti einmitt af því að þau fengu þá í páskaeggi. Páskarnir eru einnig tímamót, rétt eins og jólin, og sá siður að skreyta allt með blómum, eggjum og skærum litum er nýr af nálinni en ánægjuleg leið til að gleðja börn og sjálfan sig eftir langan vetur.
Það er löng hefð fyrir því hjá Samhjálp að gleðja skjólstæðinga samtakanna með páskaeggjum en undanfarin ár hafa Samhjálp og Fíladelfíukirkjan, Hátúni 1, tekið höndum saman og sent sameiginlega kveðju og óskir um blessun til frelsissviptra og þeirra sem þurfa að notfæra sér þjónustu gistiskýla, í formi páskaeggja. Gulur litur og glæsileg páskaegg skreyta því að jafnaði skrifstofu Samhjálpar á þessum árstíma.
Greinin birtist áður í páskablaði Samhjálpar sem lesa má hér.
