Serían, sem er framleidd af Duffer-bræðrum og sköpuð af Haley Z. Boston, spannar átta þætti og segir frá verðandi hjónunum Rachel og Nicky sem undirbúa brúðkaup sitt í afskekktum fjölskyldukofa.
Sagan gerist dagana fyrir athöfnina, en hefst á svipmynd úr framtíðinni sem gefur sterklega til kynna blóðugan og átakanlegan endi.
Í kjölfarið er sögunni snúið aftur til upphafsins þar sem áhorfendur fylgjast með því hvernig spennan magnast smám saman upp. Undarlegir atburðir fara að gerast og Rachel sannfærist um að eitthvað skelfilegt sé yfirvofandi.
Boston hefur sagt að kjarni þáttanna sé óttinn við að giftast röngum einstaklingi. Hún hefur meðal annars vísað til þess ráðs sem móðir hennar gaf henni í æsku: að passa sig á því að giftast ekki röngum aðila. Má segja að þau heilræði hafi orðið grunnurinn að sögunni.
Ólíkt mörgum hryllingsþáttum eða myndum byggir serían ekki fyrst og fremst á atriðum sem fær fólk til að stökkva upp úr sófanum, frekar hægfara spennu, sterkri persónusköpun og sívaxandi ónotakennd sem sest að hjá áhorfandanum eftir því sem tíminn líður.
Gagnrýnendur hafa bent á að efni þáttanna geti haft sérstök áhrif á pör sem eru trúlofuð eða í föstu sambandi. Sumir hafa jafnvel gengið svo langt að segja að serían geti fengið fólk til að efast um eigið samband og hugsa sig tvisvar um áður en það gengur í hjónaband.
Kvikmyndagagnrýnandinn Alex Maidy sagði til dæmis: „Ef Jaws fékk fólk til að óttast sjóinn, þá mun Something Very Bad Is Going To Happen hræða líftóruna úr öllum sem eru að hugsa um að gifta sig.“
Þrátt fyrir slíkar viðvaranir hefur serían notið mikilla vinsælda. Fjöldi áhorfenda segist hafa horft á alla átta þættina í einum rykk og hrósar bæði frumleika, stíl og hrollvekjandi andrúmslofti.
