Kjartan Guðbrandsson starfar sem einkaþjálfari ásamt því að vera aðstoðarþjálfari meistaraflokks ÍA í fótbolta. Við fengum Kjartan í yfirheyrslu helgarinnar.

Hvar líður þér best?
Þar sem ég er með dóttur mína í hægri hendi og soninn í vinstri, helst í Þórsmörk.

Hvað óttastu mest?
Sjálfan mig.

Hvert er þitt mesta afrek?
Að verða heiðarlegur á gamalsaldri.

Furðulegasta starf sem þú hefur tekið að þér?
Ætli það sé ekki að leika fáklædda gínu í búðarglugga við Laugaveginn.

Hver væri titillinn á ævisögu þinni?
Það er leyndó því það styttist í hana. Ég þarf að bíða aðeins lengur annars verð ég handtekinn við útgáfu.

Hvernig væri bjórinn Kjartan?
IPA bruggaður af besta vini mínum og héti Granít eða Seiður.

Besta ráð sem þú hefur fengið?
Að hlusta á Dodda vin minn.

Hvert er leiðinlegasta húsverkið?
Mér finnst leiðinlegast að brjóta saman þvottinn.

Besta bíómynd allra tíma?
Old Boy, Park Chan-wook.

Hvaða hæfileika myndir þú vilja búa yfir?
Ég mætti vera stundvísari, en ég sakna þess að geta ekki sofið út.

Hver er mesta áhætta sem þú hefur tekið?
Ég segi frá því í bókinni.

Hvaða frasi eða orð fer mest í taugarnar á þér?
Það er bara þannig, ekkert annað í boði.

Hvað getur þú sjaldnast staðist eða ert góður í að réttlæta að veita þér?
Gott kaffi og alvöru súkkulaði.

Hvað er á döfinni hjá þér?
Að halda áfram að fylla í eyðurnar í ævisögunni, gefa af mér og taka lífinu ekki of alvarlega.