María Rut Kristinsdóttir, varaþingmaður Viðreisnar í Reykjavíkurkjördæmi suður, tekur sæti á Alþingi á morgun í fjarveru Hönnu Katrínar Friðriksson sem verður á vorþingi Norðurlandaráðs í Færeyjum.

Í færslu á Facebook segist María Rut klár í slaginn og spennt fyrir verkefninu.

Tilkynning! (Nei ekki um forsetaframboð).

Ég tek sæti á Alþingi á morgun og verð út vikuna á meðan Hanna Katrin gegnir mikilvægum störfum í Færeyjum. Ég hef einu sinni áður gegnt þingmannsstörfum en þá voru skrýtnir tímar og aðeins einn þingfundur haldinn sem var falið að rannsaka kjörbréf þingmanna. Þið munið þarna þegar talningamálið í Borganesi var alltumlykjandi. Þá hélt ég ræðu um lýðræðið og kosningar. Þorgerður Katrín var forseti þingsins vegna þess að ekki var búið að mynda ríkisstjórn á þessum tímapunkti og hún starfsaldursforseti. Síðan þá hef ég meira og minna staðið vaktina í hliðarsal þingsins með Þorgerði og þingflokknum.

En nú fæ ég að stíga yfir þröskuldinn og prófa hefðbundin þingstörf í eina viku.

… Eða kannski ekki hefðbundin? Það er víst eitt og annað sem ríkisstjórnin er að leysa úr þessa stundina og forsætisráðherra að biðjast lausnar. Og enn ekki ljóst hvað verður.

Það virðist í það minnsta einkenna þingferil minn til þessa að koma inn á óhefðbundnum tímum. Hvort það hafi stærri og meiri merkingu er ekki gott að segja til um en ég er hið minnsta klár í slaginn og spennt að takast á við þetta verkefni.“