Kristrún Frostadóttir segir ástæðuna fyrir því að hún setti áhersluna á aðild að ESB til hliðar hafa verið þá að ESB aðild kljúfi þjóðina í tvennt og nú, þegar erfið staða sé í efnahags- heilbrigðis- almannatrygginga – og fleiri málum þurfum við að sameinast um það sem við þó erum sammála um. Hún segir fleiri leiðir vera til staðar til að lækka vexti hér á landi en þá einu að ganga inn í myntbandalag.
Kristrún er gestur hlaðvarps Markaðarins á Eyjunni.
Markaðurinn - Kristrún Frostadóttir 3.mp4
„Já, það hefur verið meiri hagvöxtur hérna og verðbólga sem hefur knúið áfram hærri vexti en ella,“ segir Kristrún. Hún segir að raunar sé lítill sem enginn hagvöxtur á mann, vegna þess að hann stafar fyrst og fremst af fólksfjölgun, en það breyti því ekki að þótt þetta sé vondur hagvöxtur sé samt þensla í kerfinu. Verið sé að nýta innviði mjög mikið og mikil einkaneysla hafi verið þó að hún hafi minnkað og það sé ein af ástæðunum fyrir því að vextir eru háir.
„Svo ég nefni nú ekki verðtrygginguna sem er séríslenskt fyrirbæri og hefur meðal annars gert það að verkum að fólk er skuldsettara en ella á húsnæðismarkaði og að mínu mati hefur með þeim hætti ýtt undir gírun, ýtt undir eftirspurn. Fólk hefur verið að skuldsetja sig meira en það hefur efni á og þar með ýtt undir verðbólgu.
Það sem ég vildi þó segja um þessa stöðu varðandi gjaldmiðilinn og hvert vaxtastigið ætti að vera og hvar ég myndi vilja sjá það og hvort það verði bara leyst með gjaldmiðlinum. Ég hef verið hlynnt Evrópusambandsinngöngu af miklu fleiri ástæðum en gjaldmiðlaástæðum. Þetta snýst bara um menningu, pólitík, hvar þú tilheyrir, að vera partur af stærra kerfi og geta tekið ákvarðanir um ýmsa þætti sem er til að mynda erfiðara fyrir okkur í EES.“
Hún segir ástæðuna fyrir því að hún tók þá ákvörðun að setja aðildarumsókn að ESB til hliðar í fyrsta lagi þá að þetta sé mál sem algerlega klýfur þjóðina. „Það er bara þannig. Þetta er 50/50 mál. Ég get verið með stuðning við allar tillögur okkar í velferðarmálum hjá jafnaðarfólki út um allt landi – með jafnaðar taug – en þetta er ásteytingarsteinn og ég hef sagt: núna á tímum sem þessum, í erfiðri stöðu í efnahagsmálum, í heilbrigðismálum, í almannatryggingamálum, þá þurfum við að sameinast um það sem við þó erum sammála um og ég hef verið mjög hreinskilin um þetta.
En í öðru lagi þá er það líka þannig að það eru aðrar leiðir til þess að lækka hér vexti en halda því fram að ganga bara inn í myntbandalag muni húrra vöxtunum niður. Það er ekki svo einfalt. Það er líka mjög stór ákvörðun að taka að halda að það eitt og sér muni lækka hér vaxtastig.“
Hlaðvarpsþátturinn verður aðgengilegur á hér Eyjunni kl. 8 í fyrramálið, laugardagsmorgun.
