Sigríður Á. Andersen bauð afhroð í prófkjöri Sjálfstæðisflokksins í Reykjavík í gær, en hún sóttist eftir 2. sæti en endaði með að ná ekki neinu baráttusæti. Hún segist ekki gera kröfu um sæti á lista og gengur sátt frá störfum sínum sem þingmaður og ráðherra.
Hún segir á Facebook að hún sé áfram tilbúin að leggja sjálfstæðisstefnunni lið hvar og hvenær sem er.
Margir hafa velt fyrir sér næstu skrefum Sigríðar og hafa gengið getgátur þess efnis um að hún myndi jafnvel ganga til liðs við Miðflokkinn. En hún sem og Brynjar Níelsson þingmaður, sem einnig er að hætta á þingi, hafa vakið eftirtekt síðustu misseri fyrir að vera ekki sammála stefnu Sjálfstæðisflokksins í ýmsum málum, einkum hvað varðar sóttvarnaraðgerðir og þær skerðingar einstaklingsfrelsisins sem þær höfðu í för með sér.
Í samtali við mbl.is tekur hún fyrir að hún sé að skipta um flokk.
„Ég hef margoft tekið fram, og bent fólki á, að það er hægt að hafa áhrif á pólitík án þess að vera kjörinn fulltrúi á Alþingi. Það hef ég gert í áratugi áður en ég tók sæti á Alþingi. En ég er ekki búin að ákveða mig hvað ég geri næst.“
Hún óskar sigurvegurum prófkjörsins til hamingju með árangurinn:
„Ég hef alltaf verið þakklát fyrir þann góða stuðning sem sjálfstæðismenn í Reykjavík hafa veitt mér í þingprófkjörum flokksins undanfarin 15 ár. Það á ekki síst við um fjölmennt prófkjör sem lauk í gær. Maður þakkar auðvitað kærlega fyrir það þegar nokkur þúsund merkja við mann á kjörseðli þótt það hafi ekki dugað til að ná þeim árangri sem að var stefnt að þessu sinni.
Ég mun láta kjörnefnd flokksins, sem vinnur úr niðurstöðunni, vita að ég geri enga kröfu um sæti á framboðslista flokksins.
Sem fyrr verð ég tilbúin til að leggja sjálfstæðisstefnunni lið hvar og hvenær sem er. Hún sameinar íhaldssemi og frjálslyndi á svo fallegan hátt.
Ég óska Guðlaugi Þór og Áslaugu Örnu til hamingju með skýrt umboð til að leiða framboðslista flokksins í borginni. Diljá Mist og Hildur mega sömuleiðis vera stoltar af árangrinum.“
