Starfshópur fjármála- og efnahagsráðherra hefur lagt fram þrjár tillögur sem fela í sér tilslakanir frá núverandi fyrirkomulagi landamæraskimunar. Talið er að með vægari reglum geti erlendir ferðmann hingað til lands orðið á bilinu 378-800 þúsund á næsta ári en með óbreyttu fyrirkomulagi verði þeir um 100 þúsund.
Í dag þurfa allir sem koma til landsins að fara í tvöfalda skimum með 5-6 daga sóttkví inn á milli. Tillögurnar þrjár að breytingum eru eftirfarandi samkvæmt minnisblaði starfshópsins:
„A. Vottorð frá heimalandi: Tvöfaldri skimun verði hliðrað fyrir ferðamenn þannig að fyrri skimun eigi sér stað í heimalandi ferðamannsins en seinni skimun eigi sér stað við komu á landamærum Íslands.
B. Ferðamannasmitgát: Núverandi fyrirkomulag á landamæraskimun verði óbreytt nema að því leyti að ferðamenn fái að fara í svokallaða ferðamannasmitgát í stað sóttkvíar á milli fyrri og seinni skimunar.
C. Þreföld skimun: Tillögur A og B taki báðar gildi, þ.e. þreföld landamæraskimun þar sem fyrsta skimun á sér stað í heimalandi ferðamanns, önnur skimun við komu til landsins og þriðja skimun fimm dögum síðar. Ferðamannasmitgát gildi milli annarrar og þriðju skimunar.“
Starfshópurinn telur að tillögurnar geti lækkað atvinnuleysi á næsta ári um 0,5 til 1,5%.
