Markaður Fréttablaðsins skýrir frá þessu í dag. Fram kemur að það sé sameiginlegur skilningur forsvarsmanna helstu lífeyrissjóða landsins að samkomulagið verði ekki endurnýjað.
Tilgangur þess var að bregðast við miklum samdrætti í útflutningi vegna heimsfaraldurs kórónuveirunnar og stuðla þannig að stöðugleika á gjaldeyrismarkaði.
Gengi krónunnar gagnvart evru hefur veikst um liðlega 20% á árinu og það þrátt fyrir að lífeyrissjóðirnir hafi að mestu gert hlé á erlendum fjárfestingum síðustu sex mánuði. Seðlabankinn hefur selt rúmlega 200 milljónir evra úr gjaldeyrisforða sínum frá upphafi faraldursins og þannig haldið aftur af enn frekari gengisveikingu.
Á undanförnum árum hafa lífeyrissjóðirnir aukið erlendar fjárfestingar sínar mikið og nema gjaldeyriskaup þeirra að meðaltali um 10 milljörðum króna á mánuði. Markaður Fréttablaðsins segir að ef gjaldeyriskaup sjóðanna verði með svipuðum hætti þegar samkomulagið við Seðlabankann rennur út geti það að öllu óbreyttu skapað mikinn þrýsting á gengi krónunnar.
Í lok ágúst sagði Ásgeir Jónsson, seðlabankastjóri, í samtali við Fréttablaðið að hann gerði ráð fyrir að sjóðirnir myndu áfram sýna samfélagslega ábyrgð í gjaldeyriskaupum svo lengi sem heimsfaraldurinn vari.
„Ég held að fæstir vilji að sjóðurinn sem þeir greiða í standi í gjaldeyriskaupum sem veikja gengið og skapa óstöðugleika og verðbólgu.“