Eins og er þá geta aðeins þeir sem eru með vínveitingaleyfi, eða leyfi til innflutnings á víni, keypt áfengi í Costco. Það mun hins vegar breytast ef, eða þegar, frumvarp dómsmálaráðherra sem heimilar netverslun innanlands með áfengi, verður samþykkt. Þá verður hægt að panta áfengi í gegnum vefsvæði hjá Costco, gegn ákveðnum skilyrðum.
Samkvæmt frumvarpinu á einnig að mæta kröfum minni áfengisframleiðenda, til dæmis brugghúsum úti á landi, og heimilað í tilteknum tilvikum að þeir selji afurðir sínar í smásölu beint til neytenda.
Neytendum er hinsvegar þegar heimilt að flytja inn áfengi til landsins til einkanota heim að dyrum, t.d. í gegnum erlendar vefverslanir með áfengi og hefur það verið leyft síðastliðin 25 ár.
Töluverður verðmunur er á áfengum drykkjum í Costco annars vegar og Vínbúðum ríkisins hins vegar, líkt og kemur fram í umfjöllun ViðskiptaMoggans í dag, en munurinn er allt að 68% þegar mest lætur.
Samkvæmt ViðskiptaMogganum er verðmunurinn nokkur á heimsþekktum vörumerkjum, Costco í vil. Smirnoff vodki er t.d. 9.4% dýrari í Vínbúðunum og Jameson viskí er 8.7% dýrara í Vínbúðum ríkisins.
Verðmunurinn er meira en 50% í þremur samanburðardæmum. Þar er Chivas Regal 12 ára viskí á 6.660 í Costco, en 11.199 krónur í Víbúðunum. Það er 68% munur.
Þá kostar kassi af 24 Stella Artois bjórflöskum 5.328 krónur í Costco, en ef keyptar eru 24 slíkar flöskur í Vínbúðunum, kostar það 8.616 krónur. Verðmunurinn er 61.7%
Svipaða sögu er að segja af Cobra bjór í litlum flöskum, hvar tólf slíkar kosta 2.775 krónur í Costco en 4.548 í Vínbúðunum, sem er tæplega 64% munur.
Í umsögn Félags atvinnurekenda á frumvarpsdrögum dómsmálaráðherra er því spáð að rekstrargrundvelli ÁTVR sé verulega ógnað með frumvarpi Áslaugar Örnu:
„Athygli vekur hversu veigalítil umfjöllun er í skjalinu um áhrif fyrirhugaðra breytinga á rekstur ÁTVR. Það blasir við að bæði innlendir framleiðendur og innflytjendur áfengis munu stórauka sölu í gegnum netverzlanir, gangi áformin eftir. Stígi matvöruverzlanir inn á þennan markað, eins og telja verður yfirgnæfandi líkur á, mun draga hratt úr sölu í ÁTVR. Ekki verður séð að neitt sé því til fyrirstöðu að netverzlanir keppi í verði við ÁTVR, sem að óbreyttum lögum hefur engin úrræði til að bregðast við slíkri samkeppni, en álagning stofnunarinnar er bundin í lög. Raunar verður ekki séð að með þessum breytingum eigi ÁTVR sér rekstrargrundvöll. Æskilegt væri að við frumvarpssmíðina yrði gerð betri greining á áhrifunum á ÁTVR og hver væru þá að mati ráðherra eðlileg næstu skref, fari svo að rekstur stofnunarinnar standi ekki undir sér.“
