Björn Bjarnason, fyrrverandi dómsmálaráðherra Sjálfstæðisflokksins og áður blaðamaður Morgunblaðsins, telur að Félag fréttamanna RÚV gefi upp tilbúnar ástæður fyrir mótmælum sínum á handtöku og framsali Julian Assange, stofnanda Wikileaks.
Segir hann fréttamenn RÚV skulda hlustendum sínum aðrar skýringar, en fréttamenn RÚV báru því við að framganga Bandaríkjanna væri ógn við frelsi fjölmiðla og vegið væri að heimildavernd þeirra, sem skýrt sé kveðið á um í dómi Mannréttindadómstóls Evrópu, að sé meðal grunnskilyrða fyrir tjáningarfrelsi fjölmiðla.
Sjá nánar: Félag fréttamanna RÚV fordæmir meðferðina á Assange
„Fréttamennirnir taka þann pól í hæðina í ályktun sinni að „með ákæru bandarískra stjórnvalda gegn Assange og hugsanlegu framsali Breta á honum til Bandaríkjanna er einnig vegið gróflega að heimildavernd fjölmiðla.“ Vilja fréttamennirnir að íslensk stjórnvöld starfi í anda þingsályktunar frá 16. júní 2010, innan lands jafnt sem utan, og beiti sér fyrir tjáningarfrelsi og upplýsingafrelsi.Það er óneitanlega fréttnæmt þegar fréttamenn ríkisútvarpsins ganga á þennan hátt fram fyrir skjöldu vegna Julians Assange þótt ekki sé það í fyrsta sinn. Þeir skulda hlustendum aðra skýringu en þá að þeir vilji verja heimildarmenn fjölmiðla. Það er nokkuð langsótt að þessu sinni.“
Björn útskýrir ekki hvað sé svo langsótt við mótmæli Félags fréttamanna RÚV nánar og telur það sérstaklega fréttnæmt að blaða- og fréttamenn mótmæli því að maður sem birti fréttnæmar upplýsingar um stríðsglæpi og lögbrot eins voldugasta ríkis heims, sé sendur á vit örlaga sinna fyrir það eitt að hafa miðlað slíkum upplýsingum.
