„Til hvers á ég að eyða tíma mínum í það að kjósa? Þetta er spurning sem sífellt fleiri Íslendingar spyrja sig þessa dagana. Allir eru orðnir langþreyttir á loforðum og lítill sem enginn áhugi á þessari ringulreið sem virðist alltaf vera á Alþingi Íslendinga, sem svo ber lítið sem ekkert traust. Háttvirtur og háttvirtir eru orð sem flest allir í okkar samfélagi tengja ekkert við þingmenn, og því miður hafa þeir sem eru með völdin hverju sinni alveg unnið fyrir því,“ segir Þórólfur Júlían Dagsson sem sækist eftir 1.-2. sæti Pírata í Suðurkjördæmi. Til þess að skilja hvers vegna flokkar lofi og svíki segir Þórólfur að þá þurfi að skoða hvernig kjósendur velja fólk til að sitja á Alþingi:

Við kjósum flokka og þar sem ekki er hægt að ná hreinum eins flokks meirihluta þá fara flokkar í stjórnarmyndunarviðræður. Oftar en ekki þá eru kosningarloforð notuð sem skiptimynt í þeim viðræðum sem bitnar svo á hinum almenna kjósanda sem hefur nú bara ekkert um það að segja, þegar á þetta stig er komið, hvað er inni og hvað er úti.

Þórólfur segir að til sé lausn á þessu:

Hún heitir þjóðaratkvæðagreiðsla. Við Íslendingar höfum samið nýja stjórnarskrá, stjórnarskrá sem inniheldur umbót á stjórnkerfi okkar Íslendinga. Ég gæti skrifað hér heila bók um það plagg en ég ætla að einbeita mér að þjóðaratkvæðagreiðsluákvæðinu, þetta er vopn sem almenningur þarf að fá í baráttunni um betri stjórnsýslu. Þegar við erum ósammála þingmönnunum okkar eigum við að hafa leið til þess að segja þeim fyrir verkum. Öll erum við orðin þreytt á því að sparka þeim út og kjósa upp á nýtt og það ber engan árangur.

Vonast hann til að fólk í framtíðinni hafi möguleika til að koma að stjórnsýsluákvörðunum:

Þar eru þjóðaratkvæðagreiðslur öflugt tól sem mun leysa þennan vanda. Ég trúi því að í framtíðinni munum við kjósa fólk sem að er duglegt að koma vilja þjóðarinnar í verk en ekki fólk sem að lofar einhverju og stendur svo ekki við það.