Anna Kolbrún Árnadóttir, formaður Landssambands Framsóknarkvenna, hefur sagt sig úr Framsóknarflokknum. Anna Kolbrún síðustu í langri röð meðlima Framsóknarflokksins sem hafa yfirgefið flokkinn með látum í kjölfar þess að Sigmundur Davíð Gunnlaugsson, fyrrverandi formaður Framsóknarflokksins, yfirgaf flokkinn á sunnudag og tilkynnti að hann myndi stofna nýtt framboð.

Anna Kolbrún segir í bréfi sem hún sendi á Sigurð Inga Jóhannsson formann og framkvæmdastjóra Framsóknarflokksins að hönnuð atburðarrás á flokksþinginu í Háskólabíó, þar sem Sigmundur laut í lægra haldi fyrir Sigurði Ingaí formannskjöri, hafi markað djúp spor en hafi aðeins verið forsmekkurinn að því sem kom í kjölfarið:

Það er ekki létt að kveðja. En rangar ákvarðanir hafa verið teknar undanfarið ár. Sem lítið en skýrt dæmi má nefna að í hátíðarútgáfu Tímans, sem gefin var út í tilefni 100 ára afmælis flokksins, var varla minnst einu orði á Sigmund Davíð Gunnlaugsson, eins og ætlunin hafi verið að reyna að gleyma öllu því góða sem hann hefur unnið fyrir flokkinn og fólkið í landinu. Að við ættum bara að gleyma manninum Sigmundi Davíð. Nú hefur hann stigið skrefið til fulls og yfirgefið flokkinn, tekið skrefið sem ákveðnir aðilar innan flokksins hömuðust við að fá hann til að taka, ryðja honum úr vegi.

Uppfært 14:20 – Linda Jónsdóttir varaformaður Framsóknarfélags Reykjavíkur hefur einnig sagt sig úr flokknum, lýsir Linda yfir stuðningi við Sigmund Davíð.