Guðrún Hafsteinsdóttir dómsmálaráðherra segir að ekki hafi komið til sérstakrar skoðunar að semja við önnur ríki um að hýsa fanga með erlendan ríkisborgararétt sem hlotið hafa dóm hér á landi. Hins vegar sé sjálfsagt að skoða það.

Guðrún segir þetta í samtali við Morgunblaðið í dag.

Í umfjöllun blaðsins er bent á að sífellt fleiri lönd séu farin að skoða þennan möguleika og eru Eistland og Bretland til dæmis í þeim hópi. Eistar eru sagðir tilbúnir að bjóða öðrum Evrópuríkjum að semja við landið um að hýsa fanga og þá er dómsmálaráðherra Bretlands einnig að skoða þennan möguleika þar sem fangelsi í Bretlandi eru orðin full.

Guðrún segir þetta ekki hafa verið skoðað hér á landi en virðist vera opin fyrir því.

„Það hefur ekki komið til sérstakrar skoðunar í dómsmálaráðuneytinu að semja við önnur ríki um að hýsa fanga með erlendan ríkisborgararétt, og engin kostnaðargreining hefur farið fram á slíku úrræði hingað til. Hins vegar finnst mér sjálfsagt að skoða slík úrræði, enda er ljóst að sífellt fleiri lönd eru farin að skoða þennan möguleika, í ljósi aukins þrýstings á fangelsiskerfin um allan heim. Sérstaklega í tilfellum fanga sem komu hingað til lands í þeim eina tilgangi að stunda glæpi og hafa engin önnur tengsl við Ísland,“ segir hún við Morgunblaðið.

Bent er á það í umfjöllun blaðsins að hlutfall erlendra ríkisborgara sem afplána dóm hér á landi hafi aldrei verið hærra en í fyrra. Þá er meðalbiðtími eftir afplánun hér á landi eitt ár og tíu mánuðir.