Matt Turner, markvörður Nottingham Forest, viðurkennir að leikmenn liðsins tali um það sem er í gangi á bakvið tjöldin.
Um er að ræða refsingu Forest en fjögur stig voru á dögunum tekin af félaginu sem eru slæmar fréttir í fallbaráttu ensku úrvalsdeildarinnar.
Margir virðast ekki alveg skilja reglurnar sem enska deildin fer eftir en Manchester City er með 115 ákærur á bakinu og hefur ekki verið refsað fyrir að brjóta fjárlög.
Forest var hins vegar refsað um leið og hefur liðið alls ekki efni á að missa þessi dýrmætu stig í erfiðri botnbaráttu.
,,Við tölum að sjálfsögðu um þetta, við leikmennirnir. Þetta er erfitt umræðuefni því við vitum ekki neitt, ekki satt?“ sagði Turner.
,,Maður skilur ekki alveg hvort þetta snúist um að brjóta reglurnar og þú færð ákveðin stig tekin af eða hversu slæmt brotið er.“
,,Hvar er viðmiðið? Við vitum ekkert um það svo við leikmennirnir verðum bara að bíða og sjá.“
