Aðeins 9,9 prósent svarenda í nýrri könnun eru hlynntir sjókvíaeldi. 69 prósent eru á móti því en 21 prósent hafa ekki myndað sér skoðun. 43,9 prósent eru mjög á móti sjókvíaeldi.
Þetta kemur fram í nýrri könnun Maskínu sem gerð var fyrir Sósíalistaflokkinn.
Munurinn er þó nokkur þegar litið er til stjórnmálaskoðana. Sjálfstæðismenn eru hlynntastir sjókvíaeldi, en þó eru aðeins 20,9 prósent þeirra fylgjandi því en 48 prósent mótfallnir.
Hjá Framsóknarmönnum er stuðningurinn 17,2 prósent, hjá Miðflokksmönnum 16,8, hjá stuðningsfólki Flokks fólksins 15, hjá Sósíalistum 10,4, hjá Pírötum 6,4, hjá Viðreisnarfólki 4,8, hjá Samfylkingarfólki 3,6 og hjá Vinstri grænum aðeins 1,4 prósent.
Andstaðan mælist mest innan Samfylkingarinnar, 85,3 prósent.
Athygli vekur að karlar eru mun hlynntari sjókvíaeldi en konur. 14,8 prósent stuðningur mælist hjá körlum en aðeins 4,7 hjá konum.
Þá er stuðningurinn aðeins meiri á landsbyggðinni en á höfuðborgarsvæðinu. Mestur er stuðningurinn á Austurlandi, 15,4 prósent, en á milli 12 og 14 prósent í öðrum landshlutum að höfuðborgarsvæðinu undanskildu. Þar er stuðningurinn aðeins á bilinu 7 til 9 prósent.
Stuðningurinn hækkar með aldri og er mestur hjá 60 ára og eldri, 14,4 prósent. Einnig er hann mestur hjá þeim sem eru aðeins með grunnskólapróf, 13,8 prósent, en minnstur hjá háskólamenntuðum, 7,4.
Einnig var mæld afstaða til fiskeldis almennt og þar kemur í ljós að Íslendingar eru mun jákvæðari þrátt fyrir að aðeins lítill hluti eldisins sé landeldi. 47, 2 prósent eru hlynnt en 25,7 prósent andvíg. Þessar tölur hafa hins vegar verið að dragast saman undanfarin ár. Árið 2021 voru 55 prósent hlynnt en 14 prósent andvíg.
Sagan er mjög svipuð og þegar kemur að sjókvíaeldinu. Sjálfstæðismenn, Framsóknarmenn og Miðflokksmenn eru hlynntastir en Píratar, Vinstri grænir og stuðningsfólk Flokks fólksins mest á móti.
Stuðningurinn fer vaxandi með hækkandi aldri og er meiri á landsbyggðinni en á höfuðborgarsvæðinu.
Könnunin var gerð 3. til 7. nóvember. Svarendur voru 937.
