Haraldur Þorleifsson, athafnamaður og eigandi veitingahússins Önnu Jónu í Tryggvagötu , er hættur við fyrirætlan sína um að fá þjóðþekkta einstaklinga til að hlaupa í skarðið fyrir kvenkyns þjóna á morgun, þegar kvennaverkfall er.
Í tilkynningu á X greinir Haraldur frá þessu og biðst afsökunar. Fyrirætlan Haraldar vakti athygli og gagnrýni, en til stóð að Ari Eldjárn, Sigurður Guðmundsson, Unnsteinn Manuel, Sigtryggur Baldursson, Bragi Valdimar, Haraldur Þorleifsson Jón Ólafsson, Einar Örn, Gunnar Hansson, Jón Gnarr, Högni Egilsson og fleiri myndu standa þjónavaktina á morgun.
Á meðal þeirra sem gagnrýndu viðburðinn eru Sóley Tómasdóttir sem gagnrýndi viðburðinn sem og Harald sjálfan. Sagði hún að um bakslag sé að ræða í baráttunni þar sem vel meinandi karlar sem langi til að láta leggja sitt af mörkum standist ekki freistinguna til að láta kvennaverkfallið snúast um sig.
Segir Haraldur að hann hafi viljað búa til stað þar sem konur gætu verið saman. „Konur, þeirra upplifun, þeirra samstaða og þeirra verkfall er og á að vera aðalatriðið á þessum degi. — Á morgun verða mikið af konum í bænum. Sem eigandi veitingastaðar í miðbænum, sem er fyrst og fremst búinn til fyrir konur, þá vildi ég búa til stað þar sem þær getu verið saman.“
Segir hann að með þessu hafi hann gert það sem karlar gera oft, að reyna að vera með í stað þess að gefa konum plássið.
„Ég hef í dag talað við mörg og heyrt að mörgum fannst það vera mjög óviðeigandi að karlar eins og ég fengju mikla athygli á degi sem á að snúast um mismunun og ofbeldi gegn konum. Ég er algjörlega sammála því. — Minn reynsluheimur, og reynsluheimur karla, er allt annar en kvenna. Þegar mér var í dag sagt af konum sem ég ber ómælda virðingu fyrir, að ég sé ekki að hjálpa, heldur þvert á móti, þá sá ég það sem ég átti að sjálfsögðu að sjá fyrr,“ segir Haraldur.
„Mér þykir mjög leitt að þessi viðburður á morgun á Önnu Jónu hafi dregið athygli frá því sem skiptir raunverulega máli á þessum degi. Við verðum með opið á morgun og munum gera okkar besta við að þjóna þeim konum og kvárum sem koma til okkar en gestaþjónarnir verða hinsvegar ekki með okkur.
Það er ekki hlutverk kvenna að kenna körlum eins og mér hvernig á að haga sér. En ég er samt sem áður ótrúlega þakklátur þeim sem hafa í dag talað hreinskilið um þetta mál. Ég býst við því að einhver munu hrósa mér fyrir að sjá að mér. Það væri algjörlega rangur útgangspunktur og myndi aftur setja athyglina á rangan stað. Þau sem eiga allt hrós skilið eru þær konur og kvár sem hafa vakið mig, og okkur öll, til enn frekari vitundar um þessi risastóru og mikilvægu mál.“
Á morgun, þriðjudaginn 24.október er Kvennaverkfall.
Dagur þar sem konur leggja niður öll störf til að sýna með beinum hætti hvað framlag þeirra í samfélaginu er mikilvægt.
Þar sem þær minna m.a. á að kynbundið ofbeldi er miklu algengara en mörg okkar gera okkur grein fyrir og…
— Halli (@iamharaldur) October 23, 2023
