Um var að ræða leik gegn Zrinjski í fyrri leik liðanna í 3. umferð forkeppninnar.
Staðan í hálfleik var 5-0 fyrir Zrinjski en leiknum lauk 6-2.
„Það kann aldrei góðri lukku að stýra að byrja fótboltaleik einu marki undir,“ sagði Kristján Óli Sigurðsson í Þungavigtinni, en Blikar fengu fyrsta markið á sig á 2. mínútu leiksins í gær og 1. mínútu gegn FC Kaupmannahöfn á dögunum.
„Það er bara ekki í boði í Evrópu. Þú verður að hafa kveikt á þér frá byrjun og það gerðist ekki í kvöld, ekki frekar en á móti Kaupmannahöfn,“ bætti Kristján við.
Mikael Nikulásson tók til máls og telur að Óskar Hrafn Þorvaldsson, þjálfari Blika, gæti þurft að bregða frá leikstíl sínum í Evrópukeppninni.
„Það er fullreynt hjá Óskari að spila þennan fótbolta í Evrópu. Það gengur á vissum köflum í leikjunum en ansi oft eru þeir komnir með bakið upp við vegg.
Hann er ekki með leikmennina í þetta. Hann ætlar bara að spila sinn fótbolta í Evrópu og ég ber alveg virðingu fyrir því. En í Evrópu er Breiðablik ekki með leikmennina í þetta og þess vegna fá þeir öll þessi mörk á sig.
Þetta var algjört hneyksli í fyrri hálfleik,“ sagði Mikael.
Anton Ari Einarsson, markvörður Breiðabliks, hefur fengið mikla gagnrýni undanfarið en Mikael segir ekki bara við hann að sakast.
„Vörn Blika er gjörsamlega að klikka. Þetta er ekki bara markmaðurinn. Hann er bara með lélega vörn fyrir framan sig. Varnarleikurinn er bara búinn að vera hlægilegur í ansi mörgum leikjum.“
