Al Hilal hefur lagt fram 140 milljóna evra tilboð í Victor Osimhen. Sky Sports segir frá.
Osimhen var frábær fyrir Napoli á síðustu leiktíð er liðið varð Ítalíumeistari. Hann var í kjölfarið orðaður við stærstu félög Evrópu en undanfarið hefur útlitið verið á þann veg að hann verði áfram hjá Napoli.
Al Hilal gæti hins vegar breytt því.
Það er þó ekki talið að fyrsta tilboðið muni duga til og að félagið þurfi að bjóða yfir 150 milljónir evra til að Napoli íhugi tilboðið.
Al Hilal er þá til í að borga Osimhen rúmlega eina milljón evra á viku.
Nígerski framherjinn á tvö ár eftir af samningi sínum við Napoli og hefur ekki náð samkomulagi um nýjan samning hingað til.
Sádar hafa, eins og flestir vita, látið til sín taka á leikmannamarkaðnum í sumar. Fjöldi stjarna er kominn í deildina þar í landi.
Þá bauð Al Hilal 300 milljónir punda í Kylian Mbappe á dögunum en hann vildi ekki koma.
