Pierre-Emerick Aubameyang hefur fengið nóg hjá Chelsea og vill losna burt frá félaginu eftir rúma fjóra mánuði.

Framherjinn frá Gabon kom frá Barcelona í ágúst en Thomas Tuchel keypti hann til félagsins.

Tuchel var rekinn úr starfi nokkrum dögum eftir að Aubameyang kom og Graham Potter tók við.

Potter virðist ekki ætla að treysta á Aubameyang sem hefur ekki staðist væntingar í vetur og vill komast aftur til Barcelona.

Samkvæmt Diario AS hefur Aubameyang haft samband við Xavi, stjóra Barcelona, og er tilbúinn að gera allt til að snúa aftur til Spánar.

Í sömu frétt er tekið fram að Xavi hafi svarað framherjanum og biður hann um að sýna smá þolinmæði vegna stöðu Memphis Depay.

Ef Barcelona nær að losa Memphis í janúarglugganum þá gæti félagið verið opið fyrir því að taka við Aubameyang á nýjan leik.